Shirika la ORECORP lakabidhi Mabati 138 Shule ya Msingi Igalula

Posted on: December 30th, 2017

Mabati hayo yenye thamani ya shilingi milioni tatu laki nane na hamsini elfu yamekabidhiwa katika shule ya Msingi Igalula iliyopo katika kijiji cha Lubungo wilayani Sengerema mkoani Mwanza .

Akikabidhi mabati hayo Afisa Mahusiano wa shirika hilo linalojishughulisha na shughuli za utafiti na uchimbaji wa madini katika mgodi wa Nyanzaga, Bwn. John Bwana amewapongeza wananchi kwa ushirikiano pamoja na jitihada wanazozionyesha katika shughuli za maendeleo kwa kukamilisha ujenzi wa vyumba vitatu vya madarasa, “kitu ambacho kimetugusa nakuona nasi tusaidie jitihada hizo za wananchi” amesema Bwn. John Bwana.

Kwa upande wake diwani wa kata ya Igalula Mh,Onesmo Mussa Mashili ameishukuru kampuni hiyo na kutoa agizo kwa wananchi na viongozi kuwa isitokee mabadiliko yoyote ya matumizi katika misaada hiyo iliyotolewa.

Hata hivyo Afisa Elimu msingi Bwn. Pius Lwamimi kwa niaba ya Mkurugezi Mtendaji wa wilaya ya Sengerema ameishukuru kampuni hiyo kwa misaada wanayoitoa katika miradi ya maendeleo .

Bwn. John ameongeza kuwa lengo lakutoa msaada huo na kampuni yake ni kuhakikisha ujenzi huo wa madarasa ifikapo mwezi wa kwanza uwe umekamilika ili watoto wapate mazingira rafiki ya kusoma na kujifunzia.